والدة خطيب عروس بورسعيد تروي أمام الجنايات تفاصيل الساعات الاخيرة قبل الجريمة

استمعت محكمة جنايات بورسعيد، برئاسة المستشار بركات عبد الحليم الفخراني، إلى شهادة عايدة محمد إسماعيل، والدة محمود خطيب المجني عليها فاطمة ياسر، المعروفة إعلاميًا بـ عروس بورسعيد، وذلك خلال جلسة محاكمة المتهمة بقتلها.

وأجابت الشاهدة، خلال سؤالها من رئيس المحكمة عن طبيعة الإفطار الذي جمع الأسرة يوم الواقعة، قائلة: كان رز وسمك، وكان موجود كل الأسرة، منهم ولادي محمود وعبد الله والسيد وحمادة، ونجلاء بنتي.

وأضافت، ردًا على أسئلة المحكمة: كنت قاعدة أنا ودعاء، وبقولها عاوزين نجوز محمود في الشقة ونقسمها، ومعرفش إنها هتعمل كده، مؤكدة أن فاطمة كانت تتناول معهم الإفطار الرمضاني.

وتابعت الشاهدة: فطرنا وسهرنا كلنا للسحور، وكنا قاعدين مع بعض، ومحمود خد فاطمة وراحوا جابوا السحور بالموتوسيكل، وبعدها نمت، وقعدت فاطمة ووالدتها ومحمود وشهد، ومعرفش دعاء كانت قاعدة ولا لأ.

وقالت إنه مع بداية الصباح أيقظت نجلها عبد الله للذهاب إلى عمله، ثم شاهدت فاطمة مستيقظة برفقة أم ليلى، وكانتا تجلسان على السرير وتضحكان، قبل أن تخرج فاطمة مع شهد للتنزه بجوار الأرض، ثم عادتا بعد نحو 5 دقائق.

وأضافت: نزلت أقعد مع صابرين والدة فاطمة، ودخلنا البيت نحضر الفطار، وبعدها شوفت دعاء وهي نازلة وطلبت مني طشت ومياه علشان تغسل، ولما سألتها أم فاطمة عن فاطمة قالت إنها نايمة جوه، وشهد قالت لأم فاطمة إن فاطمة قالتلها إنها دايخة ودخلت تنام.

واختتمت الشاهدة أقوالها قائلة: واحد عدى على محمود علشان ياخده الشغل، وبعدها راحت أم فاطمة تدور عليها في السرير ملقتهاش، فطلعنا نجري أنا وأمها وابني وبنت بنتي، ولقيناها فوق، نايمة على المرتبة، ووسطها على الأرض، وفي إيدها تليفون ومراية، وكانت نايمة على ضهرها على الشلتة في الشقة اللي كانت هتدخلها بعد الجواز.