لاعب الزمالك يعلن تجديد عقده رسميا مع القلعة البيضاء

ونشر أحمد عبدالرحيم إيشو صور له بقميص نادي الزمالك عبر حسابه الشخصي على «فيسبوك»، وعلق: «اليوم مش مجرد توقيع على عقد جديد، لكنه تأكيد على حكاية عمرها ما كانت مرتبطة بورقة أو رقم».

وأضاف: «الزمالك هو المكان اللي بدأت فيه أول خطوة في مشواري، والنادي اللي اتعلمت فيه معنى الانتماء، وقد إيه القميص ده له قيمة ومسؤولية كبيرة وفضل كبير عليا».
وتابع: «طول الوقت كنت مؤمن إنني واخد القرار الصح، واللي أي حد يتمناه، وعشان كده كان هدفي إني أكمل في المكان اللي بحبه وسط جمهور عمره ما كان مجرد جمهور بالنسبة لي، لكنه جزء من كل لحظة عشتها داخل النادي».

كما أوضح: «في زمن بقت فيه الشائعات أسرع من الحقيقة، أتمنى إن محدش يصدق كل كلمة بتتكتب أو تتقال على السوشيال ميديا، لأن الحقيقة عمرها ما كانت كلها هناك».

وأردف: «اللي يعرفني بجد، عارف أنا مين، وعارف قد إيه الزمالك بالنسبة لي حاجة كبيرة، وبيتي فعلا اللي اتربيت فيه، وإن انتمائي عمره ما كان بالكلام».

بينما اختتم: «الحكاية مستمرة، وإن شاء الله اللي جاي يكون أجمل وأحسن، وأقدر أرد جزء بسيط من حب وثقة جمهور الزمالك داخل الملعب، لأني في الآخر واحد منكم، وفخور إني كبرت وسطكم».

يمكنك مشاركة الخبر علي صفحات التواصل