إبراهيم حسن: المصريون أحسن جمهور في كأس العالم.. وخسرنا بفعل فاعل

قدم إيراهيم حسن مدير منتخب مصر الشكر إلى الجمهور المصري، نظرا لدعمه المستمر والوقوف خلفهم طوال الوقت، مؤكدا أنهم يعملون من أجلهم، وأنهم كانوا يريدون تقديم الأفضل خلال مشوار «الفراعنة» في النسخة الحالية من بطولة كأس العالم.

إبراهيم حسن: قلبنا كان بيتقطع علشان عايزين نفضل نفرح المصريين

وقال إبراهيم حسن في تصريحات عبر قناة «أون سبورت»، على هامش وصول بعثة منتخب مصر إلى مطار العلمين وسط استقبال جماهيري ضخم: «بشكر الجمهور المصري اللي كان معانا وورانا طول الوقت، وده اللي أنا كنت متوقعه واللي إحنا كنا شغالين علشانه، الناس دي تستاهل أكتر وأحسن من كده، بس دي حاجة خارجة عن إرادتنا، إنما بقولهم إحنا مقصرناش ومتزعلوش مننا، وإحنا طموحنا كان عالي، وأنا عارف إنهم كانوا عايزين أكتر وأكتر، وكان عندهم ثقة فينا».

وأضاف: «أنا وحسام والمنظومة وكل اللاعيبة فرحانين بالمنظر اللي موجود، فرحانين بالجيل الصغير ده، اللي الحاجة دي هتبقى موجودة في ذهنه على طول، يعني دي حاجة هتخليه بعد كده يتمسك بحب مصر، والحمدلله إن إحنا السبب إن الأجيال اللي جاية يبقى عندها أمل وثقة إن مصر إن شاء الله تبقى في المقدمة في كل المجالات، مصر كبيرة وأدينا شوفنا المصريين كانوا عاملين إزاي في أمريكا وكندا، المفروض ناخد أكبر وأحسن جمهور جه في البطولة دي».

وتابع: «قلبنا كان بيتقطع إننا عايزين نفضل نفرح الجماهير المصرية، وحزننا الكبير من اللي حصل علشان الناس دي، علشان أنا حسيت بالفرحة بتاعهم لما كنا كسبانين وكنا نقدر نكمل، بس الحمدلله الناس دي اتكشفت قدام العالم كله بعد الأخطاء الرهيبة اللي اتعملت، الناس في أمريكا كانت بتحيينا بطريقة رهيبة وبتعتذرلنا على اللي حصل، محصلتش في العالم والتاريخ إن الناس كلها تقف جنبك، أنت طلعت بشرف وبفعل فاعل».

واختتم إبراهيم حسن: «والله أنا وحسام كنا بنقول للاعيبة أنسى إنك ترجع دلوقتي، وكنا قريبين منها، ومع احترامي لأي فرقة تانية، إحنا كنا بندخل أي ماتش في أي ولاية وإحنا عندنا ثقة في نفسنا، حسام كان بيذاكر كل الفرق كويس جدا، وكان بيحفظها للاعيبة، حسام تعب جامد جدا».

بعثة منتخب مصر تصل مطار العلمين.. واستقبال جماهيري ضخم

ووصلت بعثة منتخب مصر إلى مطار العلمين صباح اليوم الجمعة، قادمة من مدينة أتلانتا الأمريكية، عقب انتهاء مشوارها في كأس العالم 2026، وسط استقبال جماهيري كبير وحاشد دعما واحتفالا لما بذله «الفراعنة» بالمونديال.

وبدأ منتخب مصر مشواره في كأس العالم 2026، باحتلال وصافة المجموعة السابعة برصيد 5 نقاط، بعد تعادل أمام بلجيكا بنتيجة 1-1، ثم الفوز على نيوزلندا 3-1، وأخيرا التعادل مع إيران 1-1.

وحقق منتخب مصر فوزا تاريخيا على أستراليا بركلات الترجيح بنتيجة 4-2، بعد انتهاء الوقتين الأصلي والإضافي 1-1، ضمن منافسات دور الـ32، قبل أن يخسر من الأرجنتين بنتيجة 3-2، في مباراة دور الـ16، في مباراة شهدت ظلما تحكيميا غير مسبوق.